Est disponìbile in sas librerias su libru Gioghende e imparende - Ghjuchendi e imparendi, ideadu pro sas primas tres classes de iscola primària de s'Istitutu Cumprensivu de Pèrfugas.
Est
unu sussidiàriu cun partes dedicadas a grammàtica, pronùntzia, lèssicu,
literadura e finas aritmètica. In prus cuntenet ischedas
istòricu-geogràficas de sas biddas.
Curadore de s'òpera est Mauro Maxia de Iscofor
(Istitutu sardu-cossu de formatzione e chirca), chi at progetadu sas
atividades formativas paris cun su dirigente iscolàsticu Gianni Marras.
Sos testos sunt fatos dae mastros e alunnos de sas iscolas de Tzaramonte, Èrula,
Laerru, Martis, Pèrfugas e Piaghe, chi dae bator annos ant postu sardu e
gadduresu comente matèrias curriculares inseridas in sos PTOF (Pranos
Triennales de s'Oferta Formativa).
Pro
imbàtere a custu resurtadu, 40 mastras de iscola si sunt formadas
faghende unu cursu chi at tratadu de istòria de sa limba, grammàtica,
didàtica, literadura e àteras matèrias. In s'annu iscolàsticu 2017-2018
s'Istitutu, faghende rete cun sos Istitutos Cumprensivos de Ossi e Tiesi, at presentadu su progetu "Limba Nostra"
finantziadu dae su MIUR, chi at retzidu su prèmiu Label Europeu de sas
Limbas organizadu dae Erasmus Plus e est istadu inseridu in su portale
de sas limbas fatu dae sa Cummissione Europea (ùnicu in rapresentàntzia
de totu s'iscola italiana).
Chie tenet praghere de si comporare su libru lu podet ordinare dae su situ de Condaghes (costat 15 èuros).
