In custos annos, essende chi non s'agatat belle nudda de materiale in sardu pro sas iscolas, sos operadores chi ant fatu laboratòrios cun sos pitzinnos si sunt dèvidos ingeniare pro pòdere preparare sas letziones e pro trasmìtere a sos pitzinnos s'amore pro sa limba nostra.
Dae custu impignu nd'at essidu materiales "istravanados", chi non tenent nudda de imbidiare a cussos fatos dae sas mègius domos de imprenta e dae sos mègius istùdios televisivos. Comente custos vìdeos aprontados dae Marcella Ghiani pro sa classe 5ˆ de s'Iscola Primària de Gergei (SU) in s'annu iscolàsticu 2018-2019 (progetu L.R. 3/2009), paris cun sa mastra Lisa Sestu.
Sunt bator vìdeos chi tratant de istòria:
- "Pipius e pipias in Roma antiga" (comente biviant sos pitzinnos de edade romana);
- "De is Sardus pùnicus a su domìniu de Roma" (su percursu chi at fatu s'Ìsula nostra finas a su domìniu de Roma);
- "Sa romanizatzioni de sa Sardigna" (comente est mudada sa Sardigna a pustis de sa conchista romana);
- "Sa religioni in Sardigna" (dae s'ispiritualidade de sos Sardos antigos a sas divinidades "de importatzione", finas a imbàtere a sa cristianizatzione de s'Ìsula).
Totu sos vìdeos sunt publicados in su situ de ULS Sarcidanu - Barbàgia de Seulu.
Àteru materiale de istòria lu podides agatare in su situ de su grupu Storia sarda nella scuola italiana.
