Su libru de sas paràulas màgicas

S'Ufìtziu Limba Sarda de s'Unione Comunes de Barigadu at publicadu unu libreddu intituladu "Su libru de sas paràulas màgicas", creadu pro dare a sos mastros trastos fàtziles de traballu pro educare sos pitzinnos a sa gentilesa. In su libru b'agatades contos, poesias e ischedas interativas de colorare e compilare.

Chie nde tenet praghere podet iscarrigare su PDF incarchende in su link chi sighit:

https://www.unionecomunibarigadu.it/download/7fed879a58fe4b7ea183316bba31be99/libru-par%C3%A0ulas-m%C3%A0gicas_DEF.pdf?b9597c4edf31c8af7d58aae28fbd0eee

Fainas bellas de s'ULS de Carbònia

Pro chie cheret agatare materiales didàticos de istòria e de grammàtica, ma finas leturas pro aprofundare argumentos vàrios, bos signalamus una faina bella fata dae s'Ufìtziu Limba Sarda de su Comune de Carbònia.

In su link https://insardu.comune.carbonia.su.it/ podides agatare materiale didàticu de sos argumentos chi amus naradu e testos de lèghere pro connòschere mègius su lèssicu e sa cultura nostra.

Chie est amantiosu de sas barzelletas si podet collegare a sa pàgina https://www.instagram.com/insarducarbonia/ in ue si bi nd'agatat in cantidade, e in su canale https://www.youtube.com/@insarducarbonia-servitziulingu/featured b'at vìdeos de divulgatzione subra argumentos de istòria, de cultura, de sièntzia e de limba sarda.

Manualeddu de poesia pro poetes noitzolos

S'arte poètica est unu donu ma est finas su resurtadu de impignu e de traballu. Pro chie cheret mòvere sos primos passos in custu mundu meravilliosu publicamus unu libreddu cun carchi informu generale e cun esertzitzieddos fàtziles-fàtziles.

Su libru est pensadu pro pitzinnos de iscola mèdia ma podet èssere ùtile finas a sos prus mannos chi cherent comintzare a connòschere su mundu màgicu de sa poesia.

Bonu traballu a totus!

Iscàrriga su Pdf dae su link chi sighit:

https://www.unioneplanargia.or.it/wp-content/uploads/2025/08/POESIA_trastos-de-traballu-pro-iscola.pdf

'Colores e sabores' - Cartolàriu de educatzione alimentare pro pitzinnos de iscola primària

S'educatzione alimentare ispiegada a sos prus piticos.

Oe publicamus unu traballu bellu fatu dae Marinella Marras in sos annos colados pro s'Unione Comunes de su Barigadu. Est unu cartolàriu intituladu 'Colores e sabores', in ue sos iscolanos de Iscola primària podent agatare informatziones de cada genia in contu de màndigos e de alimentos, comintzende dae su chi si papat a ismurzare, a pràndere e a chenare e sighende cun sas traditziones alimentares sardas, finas collegadas a sos ritos sacros (comente su 'nènnere' chi si ponet in sos ritos de Chida Santa). Non mancant sas informatziones in contu de coltivatzione e allevamentu e sas règulas de igiene e de bona educatzione.

Su libru est cumpostu de ischedas chi si podent colorare, iscrìere o impreare pro imparare gioghende.

Pro chie tenet praghere de l'iscarrigare, ponimus in bassu su link a in ue si collegare:

https://www.unionecomunibarigadu.it/lista/1/categoria/22/420

Ischedas didàticas pro sa Festa de sa Mama

Dae inoghe a pagas dies amus a festare, comente onni annu, sa "Festa de sa Mama" e sas iscolas sunt giai faghende aprontare a sos pitzinnos sos traballigheddos pro festare sas mamas in manera dèchida.

Pensende de fàghere cosa agradèssida, màssimu pro sos mastros chi cherent presentare custa festa finas in sardu, ponimus a disponimentu carchi ischeda didàtica.

Una parte de custas ischedas sunt iscarrigadas dae sa pàgina https://pianetabambini.it/ chi cuntenet ischedas didàticas de tantas genias. Nois las amus bortadas in sardu, las podides iscarrigare dae sos link chi sunt in fundu.

(GF.P.) 

Sos libros "Giogamus cun sas lìteras" e "Narat su ditzu"

Comente costumat giai dae paritzos annos, ocannu puru s'Ufìtziu Limba Sarda de s'Unione Comunes de Pianalza at aprontadu materiale didàticu in sardu de dare a sas iscolas. Amus bidu, difatis, chi custa est una modalidade profetosa meda, ca sos pitzinnos s'ispàssiant cun sas ischedas didàticas e sos mastros (e genitores) tenent un'agiudu in prus cando cherent imparare su sardu a sos prus piticos.

Ocannu s'isportellu linguìsticu at seberadu de fàghere duos libreddos, unu de giogos linguìsticos (paràulas in rughe, crucipuzzle, rebus...) e unu pro giogare cun sos ditzos antigos.

Pro chie tenet praghere de los iscarrigare, publicamus sos PDF:

Giogos linguìsticos

Narat su ditzu

Connoschimus su Barigadu e sas bellesas suas

Pro agiuare sos pitzinnos de iscola a connòschere sas biddas de su territòriu issoro, s'Ufìtziu Limba Sarda de su Barigadu at publicadu su vademecum 'Connoschimus su Barigadu e sas bellesas suas', chi dat informatziones de istòria, archeologia, traditziones e gastronomia de sas biddas chi apartenent a s'Unione de sos Comunes de Barigadu.

Custu libru, chi cuntenet ischedas didàticas, esertzìtzios, crutziverbas e crutzipuzzle, permitit a sos pitzinnos de imparare ispassiende.si e dat a sos mastros trastos de traballu in sardu, est fatu cun su dinari de sa L. 482/1999 e L.R. 22/2018 e est curadu dae sa Sotziedade cooperativa "L'Altra Cultura" de Aristanis inn intro de su progetu "Barigadu in limba" (annualidade 2023).

Sas iscolas podent ritirare sas còpias in s'Ufìtziu de sa Limba Sarda (Fordongianus, carrera Francesco Coco) su martis dae sas 10 a sa una (h 10,00-13,00).

Chie tenet praghere de lu tènnere si podet cullegare a su situ de s'Unione de Comunes de Barigadu dae in ue est possìbile a iscarrigare su PDF. Su link est custu: https://www.unionecomunibarigadu.it/lista/1/categoria/22/416.

(GF.P.)